متزعلش منى............

حاسس انى مزعلك .مش كدة ؟
تصرفاتى واسلوب حياتى مش عاجباك ، بتكلم عنك كتير لكن مش بكلمك، كل يوم بوعدك انى هتغير ومش بوفى ، بقول انك ابويا وحبيبى وانت اخر شخص بفكر فيه ، مستنيك دايما تسامحنى وانا بزعل ومش بسامح على اقل حاجة ، بتكلم كتير مع كل الناس وعندك انت بتعب وبيتقل عليا النوم والارهاق ، بقضى وقت كتير فى حاجات ملهاش لزمة ووقتى معاك بعتبره عبء تقيل عليا ، بقرا مجلات وكتب كتير بمتعة واجى عند كتابك المقدس وبحس بملل وعدم فهم ، بروح الخدمة باستمرار وبقول انى بخدمك لكن الحقيقة انا بحب نفسى ، بتناول واحضر قداسات وفاكر نفسى بعمل عمل عظيم لكنى من جوه فاضى ، بعترف كل شهر بكل حاجة وبرجع اعملهم تانى بالملل لانى مش مهتم بتوبتى ، بسمع صوت ناس كتير وبصدق كلامهم ولكن صوتك انت بطنشه وانا عارف انك بتنده ، بدور على الحب وبشحت الحب من العالم برغم انك ممكن تشبعنى حب وتغمرنى ، بعاملك بقسوة وبتهمك احياناً بانك مش فاكرنى وسايبنى تعبان ، لما صديق يسيبنى ولا حبيب يجرحنى بحس ان الدنيا سودا وبنساك بنساك ، بنسى صليبك وبعتبره ذكريات متخصنيش ومش حاسس انى انا السبب ، بسمح لأفكار كتير تتعبنى ومش بفكر اشغل تفكيرى بيك ، بتمنى الموت لما بتعب من الدنيا وناسى انك انت المفروض تكون هدف حياتى ، ياااااااااااااااااااااه يا ربى انا عارف اد ايه انا تاعبك معايا اد ايه انت حنين ومستحملنى انا بجد مش عارف اقولك ايه يا اجمل اب واجمل صديق واجمل وجود فى الوجود ربى بجد انا بحبك متزعلش منى انا بحبك بحبك وان كانت كل حياتى ممكن تظهر غير ده لكن صدقنى بحبك جوايا بيحبك ولما ببعد عنك بتعب سامحنى ارجوك عارف انى مش استاهل لكن عارف برضه انى ابنك ارجوك ارفعنى وساعدنى اتغير انا بجد عاوز اتغير هتساعدنى يا بابا مش كده

اقتباس :: ياااااااااااااااااااااه يا ربى انا عارف اد ايه انا تاعبك معايا اد ايه انت حنين ومستحملنى انا بجد مش عارف اقولك ايه يا اجمل اب واجمل صديق

موضوع معزي
واكثر من رائع
ربنا يبركك شيرين

ااااااااااااااااا انتوانيت مرورك اسعدنى كتير يارب تكونى استفدتى من الموضوع