اسبوع الالام . عظة 24 مارس 2010

[ندعوك للتسجيل في المنتدى أو التعريف بنفسك لمعاينة هذه الصورة]

بسم الاب والابن والروح القدوس الاله الواحد امين

اسئلة الشعب

سؤال : واحد بيقول ان زميل ليه فى الجامعة بينتقد سفر الاناشيد ويقول ان كل هذا السفر يدعو للشهوات فبيقول انا ماعرفتش ارد عليه

ياريت تقرأ الكتاب بتاعى بتاع سفر النشيد كاتب مقدمة كبيرة عن الموضوع ده فى كلام كتير موجود فى النشيد لا يمكن يكون عبارات حب لان مثلا يقولها شعرك مثل قطيع ماعز رابض عند جبل جلعاد مين اللى تقبل ان شعرها كده
وايضا يقول مثل جيش بالوية يعنى ايه تخوف ..... ده كلام يقوله على حماته لكن مايقولوش على حبيبته . او يقول مثل فرس فى مركبات فرعون يعنى حاجات مش معقولة . اقرأ الكلام اللى انا كاتبه فى مقدمة سفر النشيد . سفر النشيد كله اشياء رمزية عن علاقة الله بالكنيسة او علاقة الله بالنفس البشرية . والا ماكانش يتحط وسط الاسفار المقدسة .

سؤال : نعرف ان السيد المسيح قال من يقول لاخيه يا احمق يستوجب نار جهنم ومع ذلك السيد المسيح قالها لحد تانى

شوف يا ابنى لازم فى كل الكلام اللى يتقال نشوف ان اللى بيتكلم له سلطان وله مالهوش سلطان زى واحد برضو سألنى قالى بيقول لا تدينوا لكى لا تدانوا . وعايز يطبقها مش ممكن
القاضى بيدين فى المحكمة ويقول الانسان ده مخطئ والانسان ده يستحق الموت
نقوله لا تدينوا
لا له سلطان ان يدين
ورئيس العمل ممكن يقول للموظف انت غلطان وانت مش كويس وانت يتخصم لك يومين
تقولى بيدينه
اقول له سلطان ان يدين

وهكذا الانبياء وبخوا كثير من الشعب لهم سلطان ان يوبخوا فكم بالاولى السيد المسيح له سلطان ان يحكم على اى شخص بانه غلطان دى مانسميهاش ادانة ومانسميهاش خروج عن الوصية . الاب فى البيت له سلطان يقول لابنه انت كذا وكذا وكذا ولازم تغير اللى انت فيه نقول بيدين لأ له سلطان وان لم يمارس سلطانه يبقى غلطان .

سؤال :
ما راى قداستكم فى الرسائل المتداولة بين التليفونات المحمولة عن معجزات تمت بواسطة قديسين وعلى من تصله الرسالة ان يقوم بارسالها الى عدد من الاشخاص واذا لم يرسلها سوف يصاب باذى واذا ارسلها سوف يحدث له شئ سار ؟

يابنى دى كلها خزعبلات معجزات القديسين نسر بها نفرح بها نقولها للناس لكن مش معناها اللى مايقولهاش يجيله ضرر . الكلام ده عيب القديسين نفسهم مايرضوش بكده . فى حاجات انا شفتها من زمان الرسائل ديه كانوا بيبعتوها مش صح الحاجات دى .

سؤال :
واحدة بتقول متزوجة وزوجها يعمل فى القاهرة وهى بتعيش فى بيت اهلها لمدة سنة ونص لان اهل زوجها يسببون لها المشاكل باستمرار

ياريت العائلات الكبيرة ماتخشش للاولاد الصغيرين اللى بيتجوزوا
يعنى واحد بيتجوز سيبوه يعيش مع مراته فى سلام لا تدخل امه ولا امها مال الكبار دول بالاولاد الصغيرين سيبوهم فى حالهم .
الام تفتكر انها دفاع عن ابنها لا لازم البنت دى تخضع ليك
يا ستى مش كده خليك واسطة خير ماتقلبيش حياة ابنك وزواجه من اجل نصائح تضره .

سؤال :
واحدة بتقول انا هاعمل عملية ضرورى خلال الاسبوع ده ومحتاجة لثمن العملية وماقالش هى مين وثمن العملية وعنوانها ايه ؟
يا بنتى ابعتيلى اسمك وعنوانك او نمرة تليفونك وقولى انا المذكورة ادناه

سؤال
انا ارملة ولى ابنة وحيدة تم تزوجيها من رجل بخيل طمعا فى ثروتى وعايز يورثنى بالحياة
انا عايزيكم فى فترة الخطوبة تدرسوا الشخص او الشخصية للزواج
ممكن البنت تعرف ان خطيبها بخيل او مش بخيل
بيقبل يجيب هدايا وله لأ قيمتها تافهة وله كبيرة
يقدروا يعرفوا من الكلام معاه ومن السؤال عن اشياء
لكن تتجوز بخيل وهى مش عارفة انه بخيل
هل الشبكة اللى قدمها تدل على انه بخيل وله ايده فرطة ؟
يعنى كله يتعرف
لان الزوج البخيل متعب

سؤال :
ما هى شروط الرهبنة وكيف يعرف الشخص ان هذه الشروط تنطبق عليه ؟
شروط الرهبنة فيه شروط عامة وفى شروط خاصة برهبنة البنات
الشروط العامة :
ان المتقدم للرهبنة يكون انسان مات عن العالم وما فيه زهد فى الدنيا كلها
فى واحد بيروح الرهبنة لان الدنيا هى اللى زهدت فيه
ويكون عنده روحيات مايغضبش بسرعة مايضايقش لما يقعد فى مجتمع يكون فى حاله وايضا يكون بيحب الصلاة ويحب يستمر فى الصلاة

بالنسبة للبنات :
سنهم لا يكون كبير
لان البنت اللى بتكبر فى السن يبقى من الصعب قيادتها تكون طبعها وقف عند وضع معين من الصعب تغييره
الرجالة مش بيهمهم كبر السن

سؤال :
واحد عايز يكون فى افتقاد فى مدينة 15 مايو ...البابا موجها كلامه للاساقفة : ياريت تحاسبوا الكهنة على عدم افتقادهم او الكاهن يعمل جدول على اللى افتقده وهل افتقد الاغنياء فقد وله الاغنياء والفقراء يعنى خلوا بالكم .

سؤال :
قداستكم وعدتم بالحديث عن اداب الحديث فى التليفون الست زوجتى مممتازة فى كل شئ ماعدا الحديث فى التليفون تتكلم بالساعة وتتكلم اثناء النوم وفى اوقات الفراغ وفى العمل

نصيحتى للسيدات خليكم تقال . يعنى الواحد يتمنى انه يسمعكم مش تتكلموا تتكلموا لغاية لما يزهق من كلامكم
الكلام بحساب زى الدهب
لحد ما الراجل يقولك انت ماكلمتنيش ليه انا عايزة اسمع صوتك
مش يقولك دوشتينى
خليكوا فى منتهى الحكمة فى كلامكم مش معناها انكم ماتتكلموش
لا تتكلموا بس بميزان

سؤال :
هل تبارك الاباركة لما نشتريها من الكنيسة ونشرب منها كلنا فى البيت هل ده حرام ؟
نعم حرام وحرام
لما انت تولف تشرب الاباركة فى البيت مش هاتشعر بقيمة السر الالهى وانت بتتناول
كل شئ له نظام وحسب ترتيب
بل ماحبش كمان ان الاديرة تعمل كميات من الاباركة وتبيع للشعب لانها بالشكل ده بتعثرهم المسالة مش مسالة تجارة

سؤال :
هل الفيتامينات المقوية حرام مع الصيام
لا مش حرام ممكن تاخد فى الصيام فيتامينات ومقويات مافيش مانع
هو اللى بنمنعه انه يكون طعام بشهوة

سؤال : ما راى قداستكم فى موضوع الزمالة بين الشباب والبنات فى الجامعة
لو كانت زمالة مجرد زمالة مافيش مانع

سؤال :
انا فى مشكلة ومعرض للسجن ولدى ثلاث اولاد وعلى اقساط وغير قادر على سدادها
ماقالناش برضو ايه الاقساط وايه عنوانه
ياريت يبقى عندنا عنوانه

على فكرة بمناسبة الديون احب اقولكم حاجة كتير ناس بيبعتولنا بخصوص الديون لطلب سدادها
الضمان يعنى واحدة تضمن زوجها ويجى زوجها يسافر ويمشى وهى اما تسدد الدين يا اما تتسجن
انصحكم بانكم لا تضمنوا احدا
الحاجة التانية ناس يشاركوا اشخاص ويرتبطوا معاهم ايضا فى الديون ويجى الشريك ده يمشى وهو يقع خلوا بالكم من حكاية الشركة دى

ثالث حاجة ناس يخشوا فى مشروع هما مايفهمهوش وبعدين المشروع يخسر فيستلفوا
حاجة تانية
اوعوا تمضوا على شيكات على بياض لما انت تمضى شيك على بياض ممكن اللى معاه الشيك يكتب عليه اى رقم بالمثل شيكات الامانة

+++++++++++++++++++++++++++

المحاضرة بعنوان اسبوع الالام

احنا داخلين بعد اربعة ايام على اسبوع الالام وعايز اكلمكم عن اسبوع الالام

انا اتكلمت عنه فى الاسكندرية والكلام اللى هاقوله غير اللى قولته فى الاسكندرية

السيد المسيح تألم كثيرا والامه لم تكن فقط فى اسبوع الالام بل منذ ولادته وولد فى عز الشتاء والدنيا برد ومافيش اغطية . وبعدين هيرودس قرر ان يقتل كل الاطفال فاضطر ان يهرب الى مصر

يعنى كانت الام من اولها وعاش حياة كلها الم فى بيت فقير وقيل عنه انه لم يكن له اين يسند رأسه وعاش بدون وظيفة رسمية وعاش فى منغصات ومؤامرات من قادة اليهود وخصوصا من الكهنة والكتبة والفريسيين . وسط اتهامات باطلة . فقالوا عنه انه مجدف وانه ضال وانه مضل وانه ببعلزبول يخرج الشياطين وانه يعاشر الخطاه وقالوا له اليس حسنا قلنا انك سامرى وبك شيطان يعنى اهانات كثيرة .

والكتاب بيقول انه جاء الى خاصته وخاصته لم تقبله ولكن اسبوع الالام كان اكثر الايام سوءا عليه من جهة الالم والعجيب ان السيد المسيح لما تألم قدس الالم بألمه . فاصبح الالم شئ مقدس ولذلك يقول الرسول بولس ان الالم هبة من الله يقول من جهة المسيح وهب لكم لا ان تؤمنوا به فقط بل ايضا ان تتالموا من اجله . يعنى الالام من اجله عبارة عن هبة وهبها لنا الله لانه ورائها الاكاليل وفوائد روحية كثيرة .

ويقول بطرس الرسول ان تالمتم من اجل البر فطوباكم ويقول الرسول ايضا ان كنا نتالم معه فايضا نتمجد معه . فالالم مربوط بالمجد . ومن الخير لنا ان نتالم هنا مثل لعازر المسكين خير من ان نتمتع مثل غنى لعازر .

وما اجمل ما قاله الشاعر امير الشعراء احمد شوقى
ومتعت بالالم العبقرى وانبغ ما فى الحياة الالم

الانسان لما يكون متالم تكون نفسه صافية اكتر من غيره . لما يكون متمتع ومبسوط بينسى ربنا وينسى نفسه ويمشى فى الارض خيالاء ولكن فى الالم نفسه تصفى . ويعرف الامور على حقيقتها بالاكثر ولذلك المريض اللى قاعد فى المستشفى وخصوصا فى العناية المركزة تلاقى قلبه مع ربنا اكثر من لما كان مش مريض .

والناس اللى بيصابوا بامراض خطيرة يبدوا ان لا شفاء لها . هولاء بتكون نفسيتهم اكثر صفاءا وقربهم لله اكتر .

وفى اسبوع الالام نحن نشترك مع الرب فى الامه كما قال الرسول لاعرفه وقوة قيامته وشركة الامه فنتألم معه ونتالم لاجله ونمجده فى الامه .

ازاى نمجده فى الامه باللحن اللى بنقوله باستمرار لك القوة والمجد والبركة والعزة يا عمانوئيل الهنا

نتابع المسيح فى هذا الاسبوع ونحن نغنى له هذه الانشودة كثيرون قد تركوه حتى تلاميذه خافوا ومشيوا
والشعب انقلب عليه وبقى يقول اصلبه اصلبه
الشعب اللى هو تعب من اجله كتير وشفى مرضاه واقام موتاه وصنع معه اعاجيب

الكل تركوه اما نحن فوسط ضعف هؤلاء الابرياء من تلاميذه ووسط خيانة الشعب والقادة نقول له نحن لن نتركك يا رب نحن معك فى كل وقت ونحن نعرف من انت . انت اللى ليك القوة والمجد والبركة .

من اكثر الناس الذين تركوه يهوذا تلميذه . العجيب ان يهوذا هذا كان الرب قد عمل معه جمايل كثيرة جدا اولا اختاره تلميذ له . فصار واحدا من الاثنى عشر . ثانيا ارسله للتبشير والكرازة وجعل الشياطين ايضا تخضع له باسم الرب كباقى التلاميذ . واكثر من باقى التلاميذ جعل الصندوق فى يده وكان ايضا من عمله انه يهتم بالفقراء والتلاميذ فى احتياجاتهم . ومش بس كده . كان يجلس بجانبه وكون ان يغمس معه فى الصحفة دى بركة كبيرة .

على الرغم من كل هذا خانه . ومش بس خانه . دا هو اللى سعى الكتاب يقول سعى الى رؤساء الكهنة وقال ماذا تعطونى لاسلمه ؟

حاجة صعبة غير منتظرة .

بيقول الكتاب ان لما اخذ اللقمة دخله الشيطان . اذا يهوذا كان مقودا بالشيطان فى خيانة سيده . وبعدين سلم المسيح بقبلة . تقدم اليه وقبله وقال له يا سيدى ولكن المسيح لم يقل له يا خائن . قال له يا صاحب ابقبلة تسلم ابن الانسان

علشان كده احنا فى الكنيسة من ليلة الاربعاء يمنع التقبيل فى الكنيسة تذكرا لقبلة يهوذا
يعنى مانسلمش على بعض ولا الاباء الكهنة ولا اى احد محتجين على تلك القبلة الخائنة الغادرة ونقول اللحن الخاص بها

لو ان الرب اساء الى يهوذا او اتعبه نقول كان يمكن بينتقم لنفسه ولكنه عمل معاه كل خير فقابله بهذا
ومش بس فى اسبوع الالام يمنع التقبيل من اجل خيانة يهوذا انما طول السنة بنصوم يوم الاربعاء احتجاجا على ما فعله واحد منا ضد سيده .

النقطة التانية :

السيد المسيح لما صلب . صلب بارادته . هو قال ان اضع نفسى لاخذها لا يستطيع احد ان ياخذها منى بل انا اضعها بذاتى لى سلطان ان اضعها وسلطان ان اخذها ايضا .

ولذلك كان يعرف الوقت الذى سيسلم فيه والمكان وذهب الى ذلك المكان الذى سيقابله فيه الجند والخائن يهوذا .

ولذلك قال للتلاميذ فى يوحنا 13 ان يسوع وهو عالم ان ساعته قد جاءت اذ كان قد احب خاصته الذين فى العالم.

ابن الانسان سيسلم لاجل الخطاه ولكن ويل لذلك الشخص الذى سيسلمه

ويهوذا لم يعبء بالحب ولا بالانذارات .

المهم فى الموضوع ان السيد المسيح ذهب بارادته الى المكان الذى سيسلم فيه وفى نفس الوقت وهنا احب ان اقول لكم امرا هاما فى حياة السيد المسيح . هو له لاهوت كامل وناسوت كامل لكن السيد المسيح لم يحدث مطلقا انه استخدم لاهوته من اجل راحة ناسوته .

يعنى مثال : لما صام الاربعين يوم جاع . وجاله الشيطان قاله لو كنت ابن الله فحول الحجارة خبز وتاكل . لعبة من الشيطان علشان يستخدم لاهوته من اجل ناسوته
ولكن استخدم لاهوته فى اشباع الجياع فى معجزة الخمس خبزات والسمكتين
يعنى استخدم لاهوته لراحة الاخرين وليس لراحته هو شخصيا

لم يستخدم لاهوته ضد الناس اللى كانوا جايين يقبضوا عليه ولكنه لم يفعل ولم يفعل من اجلنا نحن من اجل خلاصنا لكى يموت عنا لكى يفدينا فلم يهرب من الموت . فهى شجاعة ولكن ايضا حب . احب خاصته الذين فى العالم احبهم حتى المنتهى .

كان يستطيع ان ينزل من على الصليب ولكنه لم يفعل بل بقى على الصليب من اجلنا لكى يموت عنا ويفدينا ويدفع ثمن خطايانا .

الصليب بالنسبة له وبالنسبة لنا لم يكن علامة ضعف ولا عار . والا ما كنا نقبله ونجعله شعارا لنا .
ونفتخر به كما يقول بولس الرسول حاشا لى ان افتخر الا بصليب ربنا يسوع المسيح .

والالم بالنسبة لنا ليس عاراً .

كثيرا من الناس يحبون البهجة والفرح والسرور . ولكنهم يستفيدون من الالم .
الالم هو اللى بيفيدهم .

السيد المسيح فى تالمه وفى صلبه كان مثالا لنا ومعلما لنا فى اشياء كثيرة كان فى صلبه مثالا للحب والبذل يحب الخطاه حتى يموت عنهم . كلنا كنا تحت حكم الموت لان اجرة الخطية هى موت ولكنه من فرط حبه لنا مات عنا وكان ذبيحة خطية . كان قويا فى الامه وصامدا بل سر بالالم . الرسول بيقول من اجل الشرور الموضوعة امامه كان مضحيا من اجل غيره . وفى موته كان منتصرا انتصر على الشيطان وسحق راس الحية وبدد مملكة الشيطان وهو نفسه ملك على خشبة . وبموته داس الموت

المسيح فى صلبه ايضا كان مثالا فى احتماله فى احتمال الالم وفى احتمال الاستهزاء وفى احتمال الموت والمسيح ايضا فى صلبه كان مثالا فى المغفرة للمسيئين لذلك قال عن الذين صلبوه يا ابتاه اغفر لهم لانهم لا يدرون ماذا يفعلون . غفران وتقديم سبب للغفران .

السيد المسيح كان قويا على مستوى روحى وليس بالمستوى الجسدى الذى يراه الناس وكان ناجحا فى اكمال رسالته . كان ذبيحة خطية وذبيحة محرقة . وهو على الصليب كان له حنو فى قلبه نحو امه .
وتركها فى رعاية تلميذه يوحنا الحبيب . قالها هذا ابنك وقاله هذه امك .

طبعا الكل تركه لكن قلة وقفت الى جواره على الصليب امه العذراء وتلميذه يوحنا الحبيب ومريم زوجة كلوبا ومريم المجدلية . السيد المسيح فى حنوه وفى حبه حمل كل خطايانا . خطايا العالم كله . منذ ادم الى اخر الدهور . حمل خطايانا لكى يمحوها بدمه ويكون فاديا للجميع . ولذلك فى اسبوع الالام ليس مجرد اسبوع الالام ولكن هو ايضا اسبوع فداء وخلاص للبشرية كلها .

وفى مقدمة الذين فداهم وخلصهم اللص اليمين . اللص اليمين يمثل الذين جاءوا للمسيح فى اخر حياتهم فى الساعة الحادية عشر من النهار . اخطئ مدة طويلة ولكن جه فى الاخر . ونال الخلاص . ده رجاء لينا ان ممكن حد يخلص حتى فى اخر لحظة من حياته .

فاعترف بالمسيح ربا وملكا وقاله اذكرنى يارب متى جئت فى ملكوتك. وكان ايضا يعترف بان المسيح قادر على ان يخلصه .لذلك قال له السيد اليوم تكون معى فى الفردوس .

فى نقطة جميلة فى العبارة دى . لم يقل له اليوم تكون فى الفردوس . قاله اليوم تكون معى . يعنى زى ما انت ما كنت معى فى الصليب انت هاتكون فى الفردوس . فاعطاه بركة الصحبة والعشرة انه يكون معاه .

وهذا اللص لم يكن اول من دخل الفردوس . اللص مات فى الساعة الحادية عشر يعنى دخل بعدها بساعتين مش اول واحد . البعض يقول ماتعمدش . لا اتعمد المعمودية موت مع المسيح وقيامة معه وهو فعل ذلك

اخيرا اقول لكم . فى حزننا على الام المسيح لا نضيف اليه الام جديدة بخطايانا .

[ندعوك للتسجيل في المنتدى أو التعريف بنفسك لمعاينة هذه الصورة]
المحاضرة اوديو + اسئلة الشعب

لتحميل العظة من هنا

[ندعوك للتسجيل في المنتدى أو التعريف بنفسك لمعاينة هذا الرابط] [ندعوك للتسجيل في المنتدى أو التعريف بنفسك لمعاينة هذه الصورة]

لتحميل اسئلة الشعب من هنا

[ندعوك للتسجيل في المنتدى أو التعريف بنفسك لمعاينة هذا الرابط] [ندعوك للتسجيل في المنتدى أو التعريف بنفسك لمعاينة هذه الصورة]