بشير صاحبى بصراحة تاعبنى أوى
عنده أفكار مغلوطة كتير بعيدة عن تعليمنا المسيحى
الموضوع اللى عايز مساعدتكم فيه هو
ان صاحبى بشير مقتنع تماماً بموضوع الحسد
وبيقعد يحكيلى مواقف كتير زى مثلاً يقوللى
اشتريت جهاز كمبيوتر جديد
وجالى جارى عشان يباركلى ويتفرج عليه
وعجبه أوى لدرجة أنه بعد مانزل بساعة واحدة
الجهاز فصل خالص ومارديش يشتغل
قولتله طب ماجايز صدفة يا بشير أو حاجة فى وصلات الجهاز
قاللى لا يا نظير
الواد ده انا عارفه كويس
[ ده عينه وحشة ]
ومرة تانية بيقوللى وبيحكيلى بشير
كان عندى واحد ضيف وعملتله شاى فى المج المخصوص بتاعى
وهو بيشرب الشاى قاللى
الله يا بشير المج ده شيك أوووووووى
نفس اليوم باليل دخلت أعمل شاى فى المج
فرقع
قولتله يا بشير : طب أكيد ان المياه كانت سخنة على المج
عشان كده فرقع
قاللى يا نظير لالالالالا
[الواد ده عينه وحشه]
اشمعنى فى نفس اليوم يعنى المج يفرقع
أنا دلوقتى آمنت تماماً بعبارة
العين فلقت الحجر
وقاللى : بعدين يا نظير أنت ليه مش عايز تقتنع بالحسد
ماهو موجود فى الكتاب المقدس
هو مش قايين قتل اخوه حسداً
وأخوة يوسف ألقوه فى البئر حسداً
وكمان بنصلى فى صلاة الشكر ونقول
نجنا من كل حسد
ها ايه رأيك يا نظير ؟؟
أنا بقى سكت خالص ومعرفتش أرد على بشير
تفتكروا بشير عنده حق فى كلامه ؟؟
وفى فعلاً حسد ؟؟
وايه وجهة نظر المسيحية فى الحسد ؟؟
ياريت تساعدونى أرد على بشير ازاى عشان يبطل يقول عبارة
[الواد ده عينه وحشه]
موضوع: الواد ده عينه وحشة 
الثلاثاء 19 مايو - 18:23
