خناقة مع ربنا ........

دبيت خناقة مع ربنا اليوم
ايوة بجد
فى ختام صلوات الجمعة الكبيرة
وأثناء صراخ الشعب 400 مرة قائلين يا رب أرحم فى كل اتجاهات الأرض
وجدت نفسى بتخانق مع ربنا
قعدت اقوله
اولا اشكرك لأنك اليوم عملت لنا حفلة، عزومة هايلة، على أكبر وأعظم قصة حب فى كل السماء والأرض
جمعتنا حول صليبك
لميت شملنا حول الجلجثة
رائحة الطيب والبخور والعطر يملأ المكان
نقرأ عن أصوات صياح اليهود ضدك
لكننا فى المقابل نسمع لحن أومونوجينيس ونقل لك فيه
قدوس الله الذى من أجلنا صار إنسانا وهو الإله
قدوس القوى الذى أظهر بالضعف ما هو أعظم من القوة
قدوس الذى لا يموت الذى صلب من أجلنا وصبر على موت الصليب وقبله فى جسده وهو ازلى غير مائت

نسمع عن عسكرى مفترى يدق فى رجليك المسمار فتفوح منها رائحة الدم مع بقايا رائحة زجاجة الطيب الفائق السعر التى سكبتها عليهما مريم منذ أيام، لكننا نراك توصى يوحنا بأمك فنغنى لها المجمرة الذهب النقى

نسمع عن نبوات تتكلم عن ذبائح كثيرة لكننا نغنى فى المقابل ونقول لحن فاى إيتاف إينف ونقول لك فيه
هذا الذى أصعد ذاته ذبيحة مقبولة على الصليب عن خلاص جنسنا فإشتمه أبوه الصالح وقت المساء على الجلجثة

نسمع خناقة بين اللصين وجدلا بينهما عنك وتحسم انت الجدل بأن ترسل حرامى الى الفردوس بدون لا ختم ولا توقيع ولا واسطة ولا كوسة، فنصرخ لك معه بملايين الحناجر أذكرنى يا رب متى جئت فى ملكوتك

نسمع عن يوسف الرامى ونيقوديموس وهما ينزلونك من فوق الصليب مكان عرشك ليطيبوا الجسد بالطيب، فنبادر باللحن الكبير الذى نذكر أنفسنا به دائما، لحن (بيك أثرونوس) ونقول لك فيه (كرسيك يا ألله الى دهر الدهور، قضيب استقامة قضيب ملكك)

بعد كل ده الناس دى كلها فرحانة بيك يا رب ومتهللة بحبك وبتجدد عهودها معاك

لكنى دونا عن كل هؤلاء عاوز اتخانق معاك

الدنيا يا رب مليانة بلاوى
سايها ليه يا رب وسايبها لمين
مين هيجيب الملايين اللى ما تعرفكش علشان يشاركونا هذه الحفلة
فيه فى الكرة الأرضية اتنين ونص مليار صينى وهندى ومليار وربع مليار مسلم، ناسيه ليه يا رب
مين هيجيبهم دول يا رب علشان يفرحوا بيك زينا كده
هجيبهم انا؟
ما أعرفش؟
مين هيجيبهم لك
بالعربى وبصراحة ما حدش يعرف يجيبهم
الكنيسة بالعافيه بتحاول تلم لادها
مين هيجيب دول
لا البابا شنودة ولا البابا بينيديكتوس ولا بيلى جريهام،
بالعربى كده ماعندهومش امكانية ولا صحة ولا فسحة من الوقت،
مين هيجيبهم دول يا رب
يعنى ندور لهم على حد تانى يفتديهم؟!
يعنى نشوف حد يموت من أجلهم؟!
ولو بحثنا عن حد يفتديهم سنجدك انت المرشح الوحيد
اشتغل انت بقى يا رب
اشتغل وحدك لأنه بصراحة ماحدش جاهز يمد ايده معاك
اشتغل وحدك يا رب
اللى بيشك فيك اعلن له ذاتك
واللى بيسخر من صليبك اعلن له مجد هذا الصليب
واللى بيشك فى انجيلك اكشف له الحياة التى فى كلمتك
واللى بيهرب من نورك حاصره لغاية ما يقولك آمين يا رب
انا بتخانق معاك يا رب
وما تزعلش منى ده بس من العشم
منقوووووول للامانة صلو من اجل ضعفى

حلوة الخناقه دى ياشيرى

بس ربنا لما جه وفدا البشريه كلها مش احنا وبس
وهما اللى مش عايزين يفتحوا عيونهم عليه وعلى حقيقه الوهيته
متلوميش ربنا
ربنا حنين وبيدى الفرصه ل اى انسان بدل المره الف مره
ميرسى خالص ياشيرى

مرسى خالص على ردك الجميل دة فعلا زى ما انتى قولتى ربنا لما جية فدى كل البشريا بس هما مش عايزين يفتحو عنيهم ومخهم على الحقيقة ربنا ينور بصرتهم ويباركك يا قمر